हक की लड़ाई

मुड़ म कफन बाँध लो भाई
हक ल हमला पाना हे
मर जाबो के सर जाबो जी
आधू कदम बढ़ाना हे ।।।
संसो नी हे मरे जिये के
सच के संग गोठियाना हे
अपन हक ल पाये बर
आधू आधू जाना हे ।।
कोन कतके बेईमान हाबे
हमला का करना हे जी
कोन का करम करत हे
हमला शरम नी करना जी
हमर हक के बात करबो
हमला हक ल पाना हे
मुड़ म कफन बाँध लो भाई
हक ल हमला पाना हे ।।
माँगत माँगत मंगता होगेन
सब के नजर म बदनाम हम
जोन तोन का मरहा खुरहा
सबके सहिथन अपमान हम
नी डरावन बानी बाता
करबो हक के काम हम
मुड़ म कफन बाँध लो भाई
हक ल हमला पाना है ।।।
चारी चुगरी लिगरी लाखर
झन करो ग आपस म
 कोन बेचागे मोलवा म
झन गोठियाओ आपस म
सबके एक ईमान नी होय
हमला अपन ईमान बचाना हे
मुड़ म कफन बाँध लो भाई
हक ल हमला पाना हे ।।।
हमरो साथी सब सत नी हाबे
जानत हन हम मानत हन
गलत सलत ल सजा देवव
हम सत के हक ल माँगत हन
मुड़ म कफन बाँध लो भाई
हक ल हमला पाना हे ।।।


हड़ताली शिक्षा कर्मीयो को समर्पित ।।।